თბილისის სახელმწიფო სამხატვრო აკადემიის შენობის შესახებ

ანოტაცია

ვისაც ოდნავ მაინც გულთან ახლოს მიაქვს ქართული ხელოვნება, შეუძლებელია, თბილისში სამხატვრო აკადემიის, უძველესი უმაღლესი სასწავლებლის, არსებობის შესახებ არაფერი სმენოდეს. ბევრმა ისიც იცის, რომ იგი საქართველოს დედაქალაქის ერთ-  ერთ ღირსშესანიშნავ ისტორიულ ნაგებობაშია დაბინავებული.

დღევანდელი სამხატვრო აკადემიისა და მისი მიმდებარე უბნების განაშენიანების ამბავი თბილისის განვითარების ისტორიის თანმდევია და თვალნათლივ ასახავს არა მხოლოდ ქალაქის ურბანული განვითარების ციკლს, არამედ თბილისური არქიტექტურის თავისებურებასა და ქალაქის მრავალფეროვან შემოქმედებით ცხოვრებასაც.